مهم جدا جدا جدا.....(للبنات فقط)

بسم الله الرحمن الرحيم
تم كتابة هذا الموضوع باللغة الفصحى والعامية
لغرض الوصول الى الهدف المطلوب
شاع بمجتمعنا العراقي حاليا الكثير من حالات الطلاق
لدرجة إنه صارت حالات الطلاق أكثر من حالات الزواج
فلو نسأل نفسنا ليش هاي الحالات وشنو أسبابها
نشوف أسباب هوايه منها عدم معرفة البنت التصرف مع زوجها
وعلى هذا المنطلق حبيت أقدم موضوعي هذا لأحلى المنتديات ....
منتديات البغدادي
ولهذا راح أقدم نصايح للبنات حتى لا يوكعن بهذا الشر(الطلاق)والعياذ بالله
ولكن بالبداية أحب أكتب نبذة مختصرة عن الرجل
الرجل كأي إنسان له أحاسيس وعواطف
تجديه في بعض الأحيان عطوف حنون لين
ولكن في بعض الأحيان يصبح قاسي المعاملة لدرجه إنه يصبح أقسى من الحجر
والشيء المهم الذي يجب أن تعرفه البنات عن الرجل(ومع الأسف الشديد الكثير لايعرفن هذا)أنه
الرجل كالطفل يحتاج الى الإهتمام والرعاية كما الطفل
ولم يكذب نزار قباني عندما قال في شعره
لم تستطيعي بعد أن تتفهمي
أن الرجال جميعهم أطفال
فيجب معاملة الرجال بحنان وعطف مثلما الطفل الصغير الذي لاينفك بحاجة الى رعاية الأم وحنانها
بس بنات لمن أكول الرجل طفل مو تاخذنها راس خيط(ها والله واحد منكم كال الرجل طفل)لا
الرجل طفل مع الزوجة فقط فقط فقط ومع الغير لا رجل بمعنى الكلمة وكلمن حسب شخصيته
وهسه بنات راح أكتب النصايح للحياة الزوجية.....
والرجاء الرجاء الرجاء قراءتها بتركيز والأخذبها عند الزواج....
أولا:إذا جان الرجل جاي إستوه من الشغل(شلون تتعاملين وياه)
لمن يجي الرجل من الشغل فعلى المرأة تحضير نفسها تماما له (أي مكملة الطبخ ومنظفة البيت وغاسلة ومترتبة ولابسة أحلى ملابسها وحاطة أطيب العطور
بحيث من تستقبله على هيئة ملاك ونازل من السماء )مو بعدهي ما مكملة الطبخ والبيت وسخ ومبهذل وبيها ريحة بصل وثوم وغيرها وما مرتبة روحها
ولابسة ملابس مبهذلة وفوك كل هذا (شوف أمك إشسوت ,شوف إبنك إشسوه ,شوف .... ,شوف ..... )وعلى هالرنة,والملاحظة المهمة الي المرأة لازم تنتبهه الهه
إنه الرجل من يجي من الشغل أولا تعبان وثانيا على قولنا(شايف شكول شكول) وثالثا يجوز متلاغي وضايج وطالعة روحه ورابعا يجوز شغل ماكو ومن يجي
للبيت يشوف هالمآسي(والله الله يساعده للرجل يعني بره روحه طاكة ومن يجي للبيت بعد أنكس)فلتخلين بيتج هيج وخلي البيت دائما يصير جنة الرجل لأن بره
هو عايش بجهنم بحيث من يجي ويشوفج مرتبة ومكملة كلشي ولا أكو لغاوي هو نفسيته ترتاح بحيث من هو بره يظل مشغوف شوكت يرجع للبيت وإذا شفتيه
ضايج إسأليه,رفهي عنه,نسيه ظيمه وحاولي دائما تشاركيه بمواضيعه,بشغله بهدوء لا عصبية وشجعيه للأحسن دائما لعد ليش يكول المثل(وراء كل رجل عظيم إمرأة)و
أريد احجيها بصراحة من ضايج الرجل حتى لو رقص أرقصيله والشرع ما محرم هذا الشي(رقص المرأة لزوجها)وسألن وشوفن المهم إتنسيه وتريحيه من تعبه
وهمومه وليش كلت سابقا الرجل كالطفل يريد حنان حتى لو صار شايب.......هذي النقطة الأولى
ثانيا:إذا جان عندج أطفال وخاصة الرضع(شلون تتعاملين مع الزوج)
وهذي النقطة أيضا من المشاكل الرئيسية لنهاية الزواج الي متنتبه البنات الها.....
حاولي وبقدر الإمكان إنه تخلين لزوجج وكت ولأبنج وكت.....
حاولي دائما رضاعة الطفل وترتيبه وغير هذا بوكت ليس على حساب وكت الزوج,رضعي الطفل ورتبيه عندما الزوج غير موجود أو حتى لو موجود حاولي إكمال
هالأشياء بسرعة والتفرغ للزوج ولتخلين إهتمامج بس للطفل وهو ولا غيره,هذا راح يخلي الزوج يغار من إبنه وصدكيني صايرة وصايرة مشاكل من ورة هذا الشي
لأنه كلتها وراح دائما وأبدا أكررها إنه الرجل طفل مع المرأة وبهالحال راح يصير عندج طفلين فوازني بالمعاملة بينهم وكلمن إله وكته........
ثالثا:إذا جان الرجل عصبي جدا(شلون تتعاملين وياه)
إذا جان الرجل عصبي فحاولي تتعاملين وياه بروية وهدوء .......
فمثلا إذا حدث فد موقف والرجل صار عصبي وبده يصيّح فبهذي الحالة لتجاوبيه وظلي ساكتة أو جاوبيه ب(حياتي تدلل,عمري تدلل وغيرها من الكلمات المهدئة)
على شرط لتحسسيه بإنه كاعد تستهزئين أو تنطي على كد عقله ,لا بهالحالة راح يثور أكثر عالعموم عندما ينتهي غضبه ويبرد صدكيني إذا جان غلطان يجي يعتذرلج
بينما هو عصبي وإنتِ صرتِ عصبية وبديتي تصيحين وياه فهو يصير مثل النار وإنتِ درتي عليه بانزين فإثنينكم تحتركون ولا سامح الله توصل الشغلة يمد إيده عليج
وتوصل الشغلة للطلاق لا سامح الله ودائما أكررها الرجل طفل مع المرأة فعامليه بهدوء وحنان , وعلى هاي الشغلة أذكر فد موقف لإمرأة يعني صدك عاقلة ماشاء الله
,هاي المرأة هي وزوجها راحوا للحج,المهم صار موقف كوم الزوج وإضربها بنص الحجاج (وهذا الحجي بعدهم بالطريق ما واصلين لمكة)فهي إشردت على هذا الموقف
(يو أبو فلان هسه وكتها تتشاقه) فأتصورن لو ردت المرأة على زوجها بعصبية شجان يصير ,جان على قولنا (تكب العيطة)وتلتم الحجاج وما أريد أبين الحجاج الموجودين
بذاك المكان شكد لأن تعرفن بعد موسم حج ومكلوبة الدنيا ومو بس هيج يجوز توصل الحد الطلاق لو ردت عليه لا سامح الله.......
رابعا:
من الأشياء العامة والمهمة الي يجب معرفتها هو لتبينين لزوجج إنتِ أحسن منه إذا جنتِ صدك أحسن منه لأن الرجل يضوج إذا يشوف زوجته أحسن منه لأنه يطلعها بيج فد يوم
وتبقى هاي حسب شخصية الرجل ,وأيضا كوني طائعةلزوجج إسمعي كلامه بأبسط وأتفه الأشياء خاصة إذا جان زوجج شخصيته قوية لأن حتى لو غلستي عليه كم مرة
فد يوم ينفجر بوجهج وأيضا لتسألين زوجج وين رايح ومنين جاي وغيرها من هاي السوالف بحيث لتحسسيه عدم ثقتج بيه وإذا جنتي حريصة على بيتج وزوجج فأتعاملي
وياه بأسلوب غير مباشر مو بهيج إسلوب وبعد إنتِ وذكائج (عالعموم هذي النقطة الرابعة تتعلق بحسب شخصية الرجل)فأنتِ وشخصيته بعد.....
وبعد هوايه أكو أشياء بس ركزت على أهمهن...........
تحياتي الجن بنات وأتمنى الحياة الزوجية السعيدة الجن إن شاء الله................
وملخص هالحجي كله
(تره الحياة الزوجية مثل السيارة والزوجة هي السائق وبكيفها بعد تريد تردم السيارة لو تمشي بيها عدل)
ملاحظة
كل هذا الكتبته إكتسبته من واقع الحياة وآني لا طبيب نفساني ولا عالم بعلم النفس , إكتسبتها من الأحداث الي صارت كدامي أو من الأحداث الي سمعتها
وأتمنى لو إدارة المنتدى تثبت هذا الموضوع المهم كلش
بالتوفيق للجميع وأنتظر ردووووووودجن